تقنية الواقع الافتراضي أو الواقع المعزز موجودة من زمان، بس معرفتنا فيها زادت بعد لعبة بوكيمون جو، ونظارات الواقع الافتراضي، لكن تعرفون الفرق بين هالتقنيتين؟
الفرق بين الواقع الافتراضي و الواقع المعزز
الواقع الافتراضي
الواقع الافتراضي هي بيئة افتراضية كاملة تحاكي البيئة الحقيقية، وفي هالواقع يقدر الإنسان يعيش ويحس في هالبيئة، وممكن يكون فيه ردّات فعل تنعكس على هذه البيئة.
وعشان تعيش تجربة الواقع الافتراضي، ضروري تستخدم أدوات مثل نظارة Oculus ، واللي يمكن عن طريقها دمج الإنسان مع الواقع، وتستخدم هالتقنية في الألعاب أو متابعة الأفلام أو بعض أنظمة المحاكاة عشان التدريب.
أهم الأمثلة على تقنية الواقع الافتراضي هو ركوب قطار الموت (الأفعوانية) باستخدام أجهزة الـ VR، واللي فيها يعيش المستخدم تجربة غير موجودة أصلًا في الواقع، وهي واقع افتراضي يخلي الإنسان يشعر فيه بدال الواقع اللي نعيشه.
الواقع المعزز
الواقع المعزز هو إضافات تعزيزية للواقع اللي نعيشه، ومن هنا جاء اسمها، وهالتقنية تخلي المستخدم يقدر يضيف بعض العناصر المصممة بشكل افتراضي للبيئة اللي نعيشها باستخدام الأجهزة المحمولة مثل الجوال أو الأجهزة اللوحية.
أشهر الأمثلة على هالتقنية هو لعبة بوكيمون جو ، فاللعبة تعتمد على البيئة الواقعية اللي نعيشها، وشخصيات البوكيمون تظهر لنا فوق هذه البيئة بدون ما يلغى الواقع.
أهم الفروقات بين التقنيتين
- الأدوات المطلوبة: بالنسبة للواقع الافتراضي فإن نظارات ال VR ضرورية، أما الواقع المعزز فما تحتاج إلا جهاز فيه كاميرا.
- البيئة: الواقع الافتراضي البيئة اللي نعيشها هي بيئة افتراضية 100%، أما الواقع المعزز يدمج بين الواقع والبيئة الرقمية.
