مثل ما تعرفون إن كثير من الأدوات التقليدية تم الاستغناء عنها واستبدالها بأدوات تقنيّة رقميّة وأغلب هالأدوات الجديدة تكون في تطبيقات الهواتف والأجهزة الذكية، وصاروا الناس يعتمدون على هالأدوات الأخيرة عشان تلبي احتياجاتهم في مجالات كثيرة. مثلًا في السفر بنلقى مجموعة من التطبيقات المهمة اللي نستفيد منها في سفرنا وتوفر علينا الوقت والجهد والمال، وعشان كذا جمعنا لكم مجموعة مختارة من أفضل التطبيقات اللي بيحتاجها كل مسافر:
Citymapper
هذا من أهم التطبيقات اللي يحتاجها كل مسافر. و يقدم هالتطبيق خدمات مهمة تساعد المسافر إنه ما يحتار في البلد اللي بيسافر له، فيوفر له مخطط للتنقل يجمع له وسائل التنقل إذا يبي يمشي أو بالسيكل أو المترو أو الباصات والقطارات والعبّارات وخدمات سيارات الأجرة زي أوبر.. وغيرها من وسائل النقل، ولازم تكون على اتصال بالإنترنت عشان تستفيد من خدماته.
وكمان يوفر التطبيق ميزة التنبيهات والتحديثات بأوقاتها وبكذا يقدر المستخدم يعرف مثلًا موعد وصول الباص، أو القطارات الجاية والسابقة.. وغيرها، وبيبين معاه لو فيه أي تأخير في وصولها، التنبيهات تطلع لك على شاشة القفل أو على واجهة التطبيق الرئيسية، والتطبيق يدعم متابعة رحلتك خطوة خطوة على شاشة التطبيق عن طريق خريطة مباشرة.
والتطبيق يغطي أشهر البلدان السياحية اللي يكثر السفر عليها مثل لندن وواشنطن ولوس أنجلوس وسان فرانسيسكو وشيكاغو وبوسطن وغيرها.. وهالتطبيق مجاني بالكامل.
App in the Air
باختصار هالتطبيق يساعد في أمور كثيرة مهمة لأي رحلة من أي مطار، فالتطبيق ينظم لك مختلف الأمور المتعلقة بالرحلة من موعد الإقلاع والمغادرة وتتبع الحركة وتوفير معلومات دقيقة وتفصيلية للرحلة، كمان يقدم خرائط ملاحة لأقرب المطارات حسب مكانك الحالي وخرائط للتنقل في داخل المطار نفسه، وأكثر ميزة فيه إنك تقدر تستخدمه بدون اتصالك بالإنترنت، حتى تحديثات الرحلة يرسلونها لك عن طريق الرسائل النصية القصيرة.
يغطي التطبيق أكثر من 1000 شركة طيران من جميع أنحاء العالم، وأكثر المطارات ازدحام مثل دبي واسطنبول وهونغ كونغ،و باريس شارل ديغول و بكين ..وغيرها
وفيه أدوات مهمة يوفّرها التطبيق مثل إمكانية حجز أفضل المقاعد بالطيارة، والبحث عن أشهر المطاعم في المطار، ويعطيك نصائح مفيدة لك قبل وفي وبعد السفر، هذا غير إمكانية حجز سيارات الأجرة لأكثر من 200 مدنية في العالم، والتطبيق مجاني بالكامل.
XE Currency
يعطيك التطبيق عرض مباشر لأسعارصرف العملات، ويخزن لك آخر تحديثات الأسعار عشان تقدر تستعرضها بعدين بدون اتصالك بالإنترنت، التطبيق يدعم جميع العملات العالمية، ويعتمد عليه ملايين المستخدمين في العالم، ووصل عدد مرات تحميله في المتجرين قوقل بلاي وأبل ستور أكثر من 20 مليون مرة، وأكثر ميزة في التطبيق إنه يدعم تحويل العملات لأي عملة بدون ما تحتاج للاتصال بالإنترنت، عشان كذا التطبيق مفيد ومهم للمسافر.
LiveTrekker
تطبيق ممتع خلال وبعد السفر، وتقدر عن طريقه تكتب تفاصيل رحلاتك بسهولة على خرائط مفصّلة، وبعد كذا تقدر تشارك تفاصيل الرحلة لو كان معها صورة أو صوت أو فيديو مع أصدقائك وعائلتك، كمان في التطبيق قسم بيعرض لك أفضل الرحلات اللي قام فيها مستخدمي التطبيق وبكذا يقدر المستخدمين للتطبيق إضافة تفاصيل رحلتهم لمجتمع التطبيق عشان يشوفها غيرهم ويتفاعلوا معها ومع محتواها.
وعمومًا بيانات الرحلة تكون سرية وما يقدر أحد يطّلع عليها إلا إذا المستخدم نشرها وفتح الخصوصية للمستخدمين الآخرين، وكل الأدوات التطبيق مجانية بشكل كامل، ومن مزاياه دعمه للمزامنة بينه وبين منصات التشغيل الثانية.
Wolfram Sun Exposure
تطبيق خاص للّي يحبون الروقان والاستجمام على الشواطئ، تقدر عن طريقه إدارة وقت تعرضك لأشعة الشمس، ويعطيك التطبيق معلومات مفصّلة حول هذا الموضوع. فتقدر تدخل نوع بشرتك والكريم الواقي اللي تستخدمه والوقت اللي تبغى تعرّض جسمك فيه لأشعة الشمس، وبكذا يقدم لك التطبيق نصائح عنها وتنبيهات ضد أي مشاكل أو خطورة ممكن تتعرض لها بسبة الشمس.
وكمان يعطيك التطبيق معلومات ثانية مثل نوع كريم الشمس الواقي اللي يناسب بشرتك، ويقدم لك التطبيق توقعات عن مؤشر الأشعة الفوق بنفسجية للخمس أيام الجاية، وتقدر بعد تشوف مؤشرات هالأشعة لأي موقع في العالم، التطبيق غير مجاني وموجود بس على الـ iOS وسعره 0.99$
خرائط قوقل "Google Maps"
تطبيق خرائط قوقل أغلب الناس تعرفه وكسر حاجز المليار تثبيت بس على متجر قوقل بلاي، وهالتطبيق خلّى التنقل في العالم أسرع وأسهل، وصار الجميع يقدر يكتشف العالم بتفاصيله، أبرز مزاياه وفوائد خاصية التوجيهات الصوتية والاتجاهات والملاحة، وحركة المرور المباشرة، والتقارير وإعادة توجيه الطرق بالوقت الحقيقي والتجوّل الافتراضي لأشهر المعالم السياحية والتاريخية، وكل اللي قلناه يعتبر نقطة في بحر هالتطبيق الرهيب.
مترجم قوقل "Google Translate"
من أشهر تطبيقات قوقل كمان، ويعتبره المسافر أمله بالتعامل مع الأشخاص اللي ما يتكلمون لغته، يوفر لك التطبيق اللغة اللي تبغاها من بين عدد كبير من اللغات وتقدر تستخدم الترجمة فيه بدون اتصالك بالإنترنت بشرط تحميل حزم اللغات المطلوبة، وفيه أدوات رائعة مثل ميزة الترجمة داخل صورة وعن طريق الكاميرا، وميزة المحادثة ومثل التطبيق السابق كل اللي قلناه يعتبر نقطة في بحر فوائده.
Duolingo
يفيدك هالتطبيق في تعلّم لغات جديدة لما تكون رايح لدولة أجنبية يتحدثون بلغة ما تعلمتها، يستخدم التطبيق طريقة خطوة بخطوة للتعلم مع الكثير من الصور وبطريقة جميلة للجميع.
ميزة التطبيق تعليمك للغة في المجالات الأربعة لاكتساب اللغة وهي القراءة والكتابة والاستماع والتحدّث، وأغلب مشاكل تعلم اللغات تكون في التحدّث، لكن مع Duolingo بيمشي معاك بالطريقة الصحيحة اللي بتساعدك على تعلّم اللغات بأسرع وقت ممكن، والأهم من كذا إنها بطريقة ممتعة وسهلة وما تملل.
الفانوس
تركيا صارت وجهة للكثير، وأكثر العقبات اللي يواجهها الزائر هناك هي اللغة وعدم معرفته بالمعالم والأماكن المهمة مثل التعليم والفنادق والمطارات ومحلات التجارة والأسواق.. وغيرها، وتطبيقنا هذا بيفيدك إن شاء الله في هالنقطة.
درس فريق عمل التطبيق رغبات المستخدمين العرب خاصة في الاستثمار والسياحة أو حتى اللي ناوين يقيمون في تركيا، وجمعوا كل هالاحتياجات في تطبيق الفانوس ووفر أقسام تعطي المستخدم المعلومات اللي يحتاجها بسهولة في المجالات اللي ذكرناها، يوفر التطبيق قائمة لأكبر الشركات العربية الموجودة بتركيا في المجالات الخدماتية “عقار، سياحة، تجارة، تحويل أموال”، وكمان المجال التعليمي "الجامعات الحكومية أو الخاصة، أو حتى المعاهد والمدارس العربية هناك".
كذلك المجال الصحي فتقدر تستعرض المستشفيات العامة والخاصة وحتى المراكز الطبية، ويحتوي كمان على أهم المعالم السياحية في تركيا عمومًا وخاصة في اسطنبول، وما نسى التطبيق الأسواق وشبكة المواصلات والمطارات في تركيا كلها، وتقدر تستعرض هالأماكن على حسب موقعك الجغرافي الحالي.
التطبيق فيه قسم المتجر المخصص في بيع وشراء الأغراض الجديدة والمستعملة في مجال (السيارات، المفروشات، التكنولوجيا، الجوالات، الاكسسوارات.. وغيرها)، آخر شيء في التطبيق ميزة مهمة ومفيدة وهي إنك تقدر تراسل مستخدمي التطبيق بأي لغة وبيترجم لك كلامهم سواء للغة العربية أو التركية أو حتى الإنجليزية.
